Med Zerouani ملي توجعت

40

كنت ناعس فايق
بعد اتململت القيت
فيا كلام بايت
عرفتو همي لي لبسني
شدني بالليل
ؤ فيا عاد نابت
جا يفكرني ف غرام مهبول
كنت فيه طامع
انعود حاكم ولا قايد
ياك انا عاهدت نفسي
انشد لوقر
و نعيش معاها حتى لقبر
اسمعني يا بحر
جيت نشكي ليك حس لغذر
مع سر الخاطر ؤ ما نوى
بغيت اندير هواك دوا
ساعة اتهز موجك صرفقني
حتى فاق قلبي و دوى
فهمت يا بحر قصدك بالمعنى
ملحك أيداوي لجروح
ؤ سرك مدفون عند رب الحكمة
اليوم كويت ما ف الروح
ؤ درت همي ف سبيب ؤ قصبة
قلت هيا تكون طبيبي
ؤ تخيط القلب المكروح
يمكن تنزل عليا الرحمة
انا يا بحر بحالك مجروح
مولف لعداب
ما جيت انسول عل لسباب
استر عيبي عندك
ياك انت صاحبي ؤ انا صاحبك
ؤ بعد نضيق انجي نبكي عندك
ما تسيل العين بدموع حيت قلبي إيعرفك
بمواجك اداويني
ؤ ف السر تقول انا ساتر عيبك
عارف يا بحر
بلي لوقت بدالة والزمان حنات
ؤ لبكا من مور لميث خسارة
النفس يا بحر خبيثة
ؤ بشحال من تخمام أمارة
دافن انا جرحي ف ضلوعي
ما طامع ف عزو ولا يفاجيو عليا لعزاية
ولي دفنتو ما بقا ليه رجوع
ؤ قلبي ما شاري ندامة
هدا حس القلب المكروح
كيف نعاسو كيف فياقو
كاسب لخسارة .
بقلم : الطير الحر
الزجال محمد زرواني

 89 total views,  1 views today

اترك تعليق

يرجي التسجيل لترك تعليقك

شكرا للتعليق