Fahmy Aly Nasr #ضد_الهكسوس

21

ما انا كنت هناك
عند الشجراية اللي بتطرح للناس احلام
و ريحتها جميلة عشان كارهة تفرق اوهام
كان وقت العصر و انا لوحدي
جوايا حاجات
مشغول بالصبح اللي اتأخر
و العمر ساعات
على غفلة ندهني ولد أخضر
ف عنيه حكايات
و اماني بريئة صغنطوطة… نساني آهات
كان ماسك صورة بنوتة و جمالها خيال
و حلفلي يا عمو انا باعشقها و العشق حلال
تعرفها منين احكي و فضفض و اصدقني القول
و الله يا عمو انا ما باكذب و هاقول على طول
على غفلة سكت و انا بستغرب
ما تقول يا جميل
قال خايف بكره اما هنكبر هيدوسنا الليل
انا حلمي ماليني اما هنكبر هنجيب اولاد
و نحابي عليهم.. نراعيهم و نعيش أسياد
انا جيت للشجرة و كان نفسي الاقيها بخير
الاقيها تطبطب على كتفي و تبوسني كتير
اتاريهم نسيو يصحوها و الطرح اهو مات
دا ورقها دبل و فروع ماتت.. غرقت ف سكات
معلش حبيبي و قوم بينا نرويها امان
بالمية الطاهرة المبروكة و بحضن حنان
انا و انت و ناس ياما معانا ما احنا راضين
و دموع ف عنينا هتجبرنا نسقيها حنين
لكن انت ما قلتش مين هي و غاويها ازاي
قال قالو زمان اسمها خضرة مع بكره الجاي
ف كتبهم مصر المحروسة و هرم مع نيل
انا واحد وسط بشر ياما ف قلوبهم سيل
بنحب ترابها و شوارعها و نجوع و كفور
على غفلة حضنته و على خده ما شبعتش بوس
علشان ف عنيه شوفت تحتمس ضد الهكسوس

 48 total views,  1 views today

اترك تعليق

يرجي التسجيل لترك تعليقك

شكرا للتعليق