الشاعر محمد سالم يكتب أنا المصري

50

……{ أنا المصري}…..

انا الباحث فى معنى القوت
وبصرخ حتى لو مكبوت
بقول الاه باعلى الصوت
وحتى لو كلامي سكوت
بكون مقهور واقول مبسوط
وتعرف حالي من ردي

و أانا المصري

انا المصرى انا الانسان
حياتي لقيتها في الاحزان
وصبري زرعته فى الوجدان
و حتى لما كتبت ديوان
عن الدموع عن الاشجان
وقلت والله ده قدري

وأنا المصري

رسمت حياتي من بدري
بكلمه وحكمه من جدي
حافظها معايا طول عمري
تكون الباقي من حلمي
تروح الناس وتيجي الناس
وتفضل مصر يا ولدي

وأنا المصري

انا المصري وانا العربي
وبفخر ان انا شرقي
علومى في كل بيت غربي
تاريخي كتبته من بدري
ومهما كان كثير كربي
بقول افرجها يا ربي

وأنا المصري

انا مصرى وانا الايمان
انا مسيحى انا الإسلام
صدى اجراسنا من اسوان
هنا فى بحرى كأنه ادأن
انا محمد انا يونان
انا الوحدة هنا فى دمى

وأنا مصرى

انا مصرى ودا العنوان
لا انا سلفى ولا علمان
ولا وطنى ولا اخوان
انا الانجيل انا القرأن
انا التاريخ لكل زمان
والسلام دليل هدفى

وأنا المصرى

كلمات
محمد السيد سالم

 117 total views,  1 views today

اترك تعليق

يرجي التسجيل لترك تعليقك

شكرا للتعليق